أهم أنشطة سيوة
الناس الي لسه مارحتش، تعالوا اقولكم على اهم ٢٠ حاجة لازم تعملوها وتجربوها في سيوة
١. سفاري الصحراء طبعا من اهم الحاجات واحلاها لان الكثبان الرملية في سيوة ممتدة وكبيرة والتنطيط عليها بالعربيات من اكتر الانشطة متعة
٢. السباحة في بحيرات الملح، علشان احساس غريب جدا ان المية المالحة شايلاك بدون اي مجهود بسبب الملوحة العالية جدا للبحيرات. سبحان الله هي بحيرات ذاتية التجدد. كل ما يحفروا وياخدوها منها ملح، بيطلع تاني بعد ٦ شهور. مية ساقعة خد بالك ومالحة جدا، خد معاك ازازة مية حلوة تستحمى بعدها
٣. قلعة ومسجد شالي من اهم المزارات الجميلة في سيوة علشان بتشوف الناس كانت زمان ساكنة ازاي في بيوت معمولة من الكرشيف (ملح وطمي) في غرف متجاورة لازقة في بعضها. حمامات ومطابخ مشتركة. تحس انها فندق كبير الناس كلها اسرة واحدة ساكنة فيه مع بعض.
٤. جبل الموتى، والي محفور فيه مقابر من ايام الفراعنة والرومان. لازم تطلع اخره علشان تشوف واحة سيوة من الاعلى.
٥. التزحلق على الرمال Sand Boarding لازم تعملوه يوم السفاري لان المرتفعات الرملية عالية جدا ومغرية للزحلقة. بس ورينا الشطارة هتعرف تطلع وتنزل كام مرة.
٦. السباحة في عيون المية الساخنة، مثل عين كامب علي خالد. مية كبريتية سخنة طالعة طبيعية من تحت الارض وفي حمام سباحة كبير. تحس لما تنزلها انك هتعوم في سلطانية شوربة من سخونتها. عوم فيها ١٥ دقيقة مش اكتر، خصوصا الرجالة
٧. زيارة جزيرة طغاغين في قلب البحيرة، منها تقدر تشوف البحيرة من جميع الاتجاهات. من هناك تقدر تعملة رحلة بالمراكب وتزور جزر تانية صغيرة. لو حظ حلو كمان، تقدر تقيم في الجزيرة نفسها في فندق طغاغين، حيث غرفتك في قلب البحيرة وتقدر تشوف
احلى شروق واحلى غروب.
٨. التخييم في الصحراء .... ممكن تتعشى في كامب في الصحراء بعد السفاري وتمشي اخر الليل. الاحلى كمان انك تبات هناك حولين باكية نار طول الليل تتأمل النجوم وتستمتع بالهدوء. طبعا البيات في الكامب بيكون مكان بسيط جدا مش زي الفنادق (يعني مفيش حمامات خاصة ولا سيشوار ولا كاتيل في الصحراء )
٩. ركوب العجل والتوهان في شوارع المدينة القديمة ومزارع الزيتون والنخيل حواليها. جربوها قبل ما تاخدوها واتأكدوا بس الفرامل شغالة علشان مرة اخدت واحدة ومكنتش شغالة
١٠. مشاهدة الغروب من جزيرة فطناس كمان حلو جدا، خصوصا القعدات الي محطوطة في البحيرة جميلة جدا ومريحة نفسيا كدة وانت قاعد فوق المية وسامع اصوات امواج البحيرة.
١١. زيارة معبد التنبؤات / تتويج الاسكندر / وحي امون .... كلها اسماء مختلفة لمكان واحد. تقول
الاسطورة ان الاسكندر حلم بالمكان وجه مخصوص لكاهن هناك علشان يتوج ملكا على العالم. اكيد انك تزور مكان زاره الاسكندر دي حاجة مبهرة جدا. المكان فيه اثار معبد فرعوني للاله آمون.
١٢. عين كيلوباترا من المزارات المشهورة جدا في سيوة وحواليها كافيهات وقعدات كتيرة حلوة. عين اخرى فيها مية سخنة طبيعة من تحت الارض.
١٣. الاكل في سيوة مختلف عن الحاجات التقليدية الي نعرفها، ويتربع على القمة طبعا الاكلة الشهيرة *ابو مردم* .... عبارة عن طريقة تسوية لحمة او فراخ بالردم في الرمال مع حرارة مدفونة تحت الارض. طريقة slow cooking بتسوي الاكل في ٣ او ٤ ساعات. لازم تحجز من قبلها بيوم، مش تدخل مطعم وتطلبه فجأة كدة (مش بانيه هو هيتحمر ) .... مطعم البابنشال من المطاعم الاثرية في قلب قلعة شالي ومشهور بطاجن الفراخ بالزيتون، جربوه ده كمان.
١٤. المشروبات الي لازم تجربها هناك المانجا بالريحان والقهوة باللبن بالبلح، وطبعا زردة الشاي السيوي على
النار خطيرة.
١٥. متحف البيت السيوي، والي فيه بتتعرف على جانب من حياة أهل سيوة قديما وتعرف عن ثقافة الامازيغ الي بينتموا ليها تاريخيا وثقافيا. قبائل الامازيغ هي من اكبر القبائل في شمال افريقيا، خاصة المغرب. ينحدر منها اهل سيوة منذ مئات السنين قبل هجرتهم ووصولهم مصر.
١٦. جبل الدكرور من الجبال الجميلة الي تستاهل انك تطلعه (اقل من ٢٠ دقيقة) علشان منه بتشوف بحيرات ومزارع سيوة، ولو وقت الغروب هيكون احلى كمان.
١٧. اسواق شالي للهدايا والتذكارات جميلة جدا. هتلاقوا كليم وشنط وجلود واباجورات ملح تمتص الطاقة السلبية
١٨. بلح وزيت زيتون بقى بالهبل بقى وانتوا مروحين .... هتلاقوا محلات في وسط البلد بتبيع انواه واشكال مختلفة من البلح والعجوة، واكيد طبعا زيت الزيتون اشتروا منه بالجراكن لانه حلو جدا جدا
١٩. معبد ام عبيدة، هو عبارة عن معبد قديم متهدم، توقفوا فيه سريعا للتصوير. اسمه كدة علشان الي لقيته كان عندها عيل اسمه عبيدة
٢٠. كل بقى الي مكتوب ده هيكون موجود في رحلتنا الاخيرة لموسم سيوة هذا الشتاء.
مقالات أخري
التعليقات