الادرنالين في ارمينيا
مين جاهز يطير لمسافة ٢٥٠٠ متر متشعلق على ارتفاع اكتر من ٥٠٠ متر بين جبلين واخدود؟؟
ارمينيا ماطلعتش مملة خالص والادرنالين طلع للركب (شوفوا فيديو في اول كومنت)
موعدنا مع التقرير اليومي من رحلتي الحالية في ارمينيا
ما تنساش تعمل لايك وتقولي مبسوط بفكرة التقارير اليومية دي؟
- الإقامة في قرية TATEV كانت في guesthouse بسيط ونظيف وجميل جدا جدا في قلب الجبال. اشجار تفاح ومشمش وجوز حواليك في المكان والفطار برايفت لوحدك في الجنينة وكله اكل بيتي اورجانيك حلو جدا
- انا شخصيا بحب الاماكن البسيطة زي دي لانها بتكون authentic experience وبتشوف اهل البلد البساط الي عايشين حياة بسيطة جدا. Old Tatev Guesthouse اسم المكان علشان لو حد حب يروح.
- نبدأ يومنا بزيارة اشهر واقدم حاجة في قرية تاتيف وهو طبعا مجمع الاديرة والكنائس الي عمرها يتعدى ال١٢٠٠ سنة. احلى حاجة طبعا الفيو الرائع للمكان من على جرف عااااالي جدا. شوفوا صورة موقع الدير خطير ازاي.
- تقدروا تتصوروا كمان صورة مع الدير من على view point عالية حلوة اوي وقريبة من المكان.
- المكان كله روحانيات وتاريخ كتير اوي. كانت قلعة لحماية المنطقة واسوارها وابراجها عالية ومنيعة وفيها فتحات لرماة السهام من خلف الاسوار. كانت قديما كمان اكبر جامعة تدرس العلوم الطبيعية والدينية.
- الكوميدي قديما انها اعلنت نفسها جمهورية مستقلة سنة ١٩٢٠ ولمدة ٦ شهور وسمت نفسها جمهورية ارمينيا الجبلية قبل ما الجيش الاحمر السوفيتي الارميني يضمها طبعا للبلاد. (جمهورية زفتى ستايل 
)
- احلى حاجة طبعا كانت ركوب التلفريك الاطول في العالم بمسافة حوالي ٦ كم والي في موسوعة جينيس للارقام القياسية من سنة ٢٠١٠. بيعبر بيك فوق جبال المنطقة العالية والاخاديد والوديان الي بينهم والملونة بالاخضر والاحمر والاصفر والوان الخريف الرائعة والي بتكون مغطاة بالثلوج في الشتاء.
- الرحلة بالتلفريك بتاخد حوالي ١٢ دقيقة والتذكرة رايح ب١٤ دولار ورايح جاي ب١٨ دولار. لازم تاخدوها رايح جاي طبعا وتركبوا في ميعاد التذكرة لانها زي القطر كدة بمواعيد 
- المفاجأة الأحلى كانت ال ziplining اعلى هذه الجبال والاخاديد الرائعة. تذكرته للفرد غالية شوية بحوالي ٣٠ دولار ولكن بجد يستحق جدا جدا جدا. المسافة المقطوعة ٢٥٠٠ متر على ٤ احبال ماشيين زجزاج فوق الجبل والاخدود. بجد روعة وسريع وممتع جدا.
- الاكل الارماني لسه بيبهرني وجربت الكباب (الي هي الكفتة بتاعتنا) ولكنها طلعت جوووووسي بشكل غير طبيعي. سيخ طويل زي في الصورة ده ب٢.٥ دولار فقط. كان ينقصها شوية طحينة وتدخل العالمية ... فكرتني بمأساة عيشتها من قبل في ايران واوزبكستان، احلى مشويات في العالم ولكن معندهمش طحينة.
مقالات أخري
التعليقات