رحلة صلاله في 10 نقط
١٠ حاجات لازم تعرفها علشان تسافر صلالة في موسم الخريف
١. تحس انك روحت سريلانكا او تايلاند واحيانا تحسسك انك روحت جنوب افريقيا .... جبال ظفار في اقصى غرب سلطنة عمان تكونت امام سواحلها منطقة صلالة وخلتها متميزة كدة
٢. موسم السفر بتاعها من شهر يونيو الى شهر سبتمبر
لما بتكون درجات الحرارة في الشرق الاوسط كله من التلاتينات للخمسينات ... هتلاقي هنا جو خريفي جميل ممطر احيانا ومليان رذاذ احيانا ... مفيش شمس تقريبا ولكن سحب تظلل كل مكان. الجبال والسهول خضراء في كل مكان وتتفجر الشلالات والينابيع بالمياة الغزيرة. بعض العيون والشلالات تعتمد بشكل كلي على قوة الامطار خلال فصل الخريف.
٣. التأشيرة لعمان دلوقتي سهلة واونلاين للمقيمين في الخليج او من خلال شركات كتير بتعملها بأسعار تتراوح من ١٢٥٠ جنية الى ٢١٠٠ جنية ... على حسب مدة استخراجها ووقتها.
٤. الطيران من القاهرة طبعا على الطيران العماني الخمس نجوم سواء في البيزنس او الاقتصادي ... مواعيد طيران كتير جدا الى صلالة من العاصمة مسقط
٥. المقيمين في الخليج عندهم طيران مباشرة متوفر من كل دول الخليج ورخيص وآثم الي ما زارهاش دلوقتي منهم
٦. الاقامة اسعارها معقولة في الفنادق في وسط المدينة ... من ٥٠ الى ١٠٠ دولار وعلى البحر طبعا اغلى ولكن بالنسبة لينا كمصريين مش محرومين من البحر اوي... خلينا في الرخيص جوة المدينة
الارخص كمان جدا هي الشقق المفروشة .... سويتات كتير فندقية واسعارها ارخص ومساحتها اكبر ومناسبة للصحاب والعائلات
٧. البرنامج السياحي عندك محتاج تقريبا ٣ ايام كاملين
يوم في الشرق ويوم الغرب ويوم في الشمال والوسط
الجانب الشرقي
عين اثوم، وادي دربات، جبل سمحان، منطقة انعدام الجاذبية، شاطي مرباط
الجانب الغربي
شاطي افتلقوت, منطقة المغسيل, مطل افيشان, منطقة شعت في ولاية رخيوت
الجانب الشمالي
منطقة سهل وجبل اتين ( قريب من صلاله ), ضريح النبي ايوب, عين حمران, عين جرزيز, سهل شير
٨. اكيد في الانتقالات هتحتاج عربية لوحدك او مع مرشد. اغلب المزارات لا تحتاج الى دفع رباعي
تقدر تأجر عربية لوحدك وتنطلق تستكشف لوحدك حوالي ٤٠ دولار سيارة عادية و٨٠ دولار سيارة دفع رباعي
اماكن كتير تتراح عادي بالعربية السيدان العادية واماكن قليلة تحتاج سيارات دفع رباعي (عين كور مثلا)
وتقدر تاخد عربية مع مرشد وده بيكون عارف دهاليز كل المزارات وهيلففك البلد من غير ما تشيل هم، لكن طبعا التكلفة هتزيد لانه تقريبا بياخد من ٥٠ ل ٧٠ دولار في اليوم
٩. الاكل الشعبي هنا رز ومشاوي واسعاره معقولة. رز ونص فرخة ٣ دولار مثلا. وهتلاقي مطاعم لكل حاجة هنا ... لبناني هندي فاست فوود
لازم تجربوا الفوااااكة هناك من جوز الهند للبابايا لحاجات تانية استوائية حلوة اوي
كمان الحلوى العمانية لازم تجربوها طازة من محلات كبيرة ومشهورة وهتحبوها اوي
١٠. الشوبينج هناك اسعاره منافسة بصراحة واحسن من مصر شوية طبعا ... الهدايا التقليدية اللبان الي بيتحرق للبخور .... المصريين القدماء كانوا يستوردوا من صلالة واطلقوا عليها هي والصومال * بلاد بونط *
مقالات أخري
التعليقات