تاشيرة جورجيا
واحدة من اهم مميزات السفر الى جورجيا هي ان التاشيرة بتاعتها اونلاين وسهلة جدا، لكن للأسف في ناس كتير بتترفض وهي بتقدم عليها اونلاين. ازاي كدة؟ انا تحريت عن الموضوع وبحثته مع ناس قدمت وقبلت واترفضت، واعتقد ان المشكلة في اتباع الخطوات الصحيحة الاونلاين. خليني اخدكم واحدة واحدة واقولكم على اشهر خطئين ممكن يخلوك تفشل في الحصول على التاشيرة اونلاين.
١- التقديم اونلاين على موقع التاشيرة في اللينك ده
٢- بتختار الجنسية ونوع جواز السفر و تكتب تاريخ انتهائه. جواز السفر لازم يكون صالح لمدة ٣ شهور من تاريخ وصولك المتوقع الى جورجيا.
لو معاك تاشيرة شنجن/امريكا/انجلترا او اقامة في دول الخليج، من حقك انك تسافر جورجيا من غير تاشيرة. علشان معايا شنجن، حطيت بياناتي وبيانات التاشيرة بتاعت المانيا، والموقع قالي مش محتاج تاشيرة. دخلت من المطار واخدت ختم دخول وبس.
٣- تختار تاريخ وصولك المتوقع الى جورجيا. التاشيرة المصدرة بتكون صالحة لمدة ١٢٠ يوم لكن ان مصرح ليك بقاء ٣٠ يوم فقط من اول يوم وصول خلال ال١٢٠ يوم. التاشيرة كمان دخول متعدد، يعني تقدر تسافر مرتين كل مرة ١٥ يوم مثلا.
بيقولك هنا ان رسوم التاشيرة ٢٠ دولار، غير قابلة للاسترداد.
٤- Terms & Conditions صفحة روتينية، بتختار كل الي فيها وتكمل على الي بعدها
٥- وصلنا بقى للصفحة الي فيها المشاكل
- الاسم: لازم تكتب جميع الاسماء الي في جواز السفر بتاعك في خانتي الاسماء. يعني انا ما ينفعش اكتب
First Name: Amr – Surname (Family name): Badawy
لازم اكتب اسم ابويا وجدي وجد جد جد جدي و اسم العيلة. اكتب كل الاسماء المكتوبة في جواز السفر. لو حركت الماوس على خانة الاسم، هتلاقي معلومات بتطلع تديك tips بخصوص الاسماء الي تكتبها
- الصورة: ناس كتير معندهاش خبرة في موضوع الصورة ده وبتحط صورة غلط، ويترتب على ذلك رفض التاشيرة. هم حاطين على جنب لينك فيه جميع شروط الصورة المقبولة، اطبعها او طلعها من تليفونك، ورح الاستوديو وريها للمصور هناك علشان يصورك صورة على خلفية بيضاء مطابقة للمواصفات. معظم الاستوديوهات بتكون عارفة المواصفات، ولكن اطلبها منه تاني امعانا في التاكيد.
- لو مسافر مع مراتك او ولادك حطهم في travel companion, لكن لو مسافر لوحدك او مع حد من صحابك سيبها فاضية.
- وفي الاخر حمل upload صورة ملونة واضحة لجواز السفر بتاعك.
مواصفات الصورة
Information BOX
دائما هتلاقي على اليمين بوكس مكتوب بالازرق كدة، بيكون مكتوب فيه جميع التعليمات المتعلقة بكل صفحة. اقراه كويس برضو علشان لو عندك اسئلة. وهتلاقي في الركن FAQ الاسئلة الاكثر سؤالا المتعلقة بالتأشيرة او بجورجيا. اقراهم لو عندك اسئلة.
الموافقة بتاخد قد ايه؟
بعد لما تخلص جميع الخطوات وتدفع ال٢٠ دولار، انتظر من ٥ الى ١٥ يوم عمل، وبتوصلك على الايميل بتاعك. اطبع منها نسختين وخليهم معاك وانت مسافر.
محتاج ايه تاني؟
- تامين صحي من شركة تامين مصرية، قيمته لا تتعدى ال١٠٠ جنية. ممكن مثلا شركة الدلتا للتامين او Allianz.
- تذكرة عودة الى بلدك
- حجز فندق/هوستل/شقة
- اثبات نفقات (كاش/كريديت كارد)
هل في حد بيشوف الورق ده في مطار السفر او الوصول؟ الناس الي اعرفهم لم يطلب منهم ذلك، لكن ممكن يطلب منك ويتم رفض دخولك. جهز الورق وخده معاك وانت مسافر.
التقديم في السفارة
ممكن كمان تقدم على التاشيرة في السفارة نفسها وتاخد تأشيرة ورقية على جواز السفر بتاعك، لكن معرفش حد عملها. لو حد عملها يا ريت يحكي تجربته وهل في طلبات اخرى في السفارة وبتاخد وقت قد ايه.
اعمل ايه لو اترفضت؟
لو عملت كل الخطوات السابقة بدون ولا غلطة وتم رفض تأشيرتك، يبقى تروح للسفارة وتقدم هناك وتستفسر عن سبب الرفض. لو حد عنده تجربة مع الرفض، يا ريت يشاركها معانا.
مقالات أخري
التعليقات